Σumar DERWIC poems

[Izem33]

NELLA DA, DAGI, ГI

Tamaziɣt tella daddeɣ,
Ur idd ar ass-ddeɣ ;
Unna iran ad i-tt-ineɣ
Nugi-t ad yili yidneɣ ;
Amaziɣ ur ileggwaɣ,
Idder diges ublalaɣ ;
Nella da, dagi, ɣi ;
A nili mek nra !
Llam da, ɣas dɣi,
Irin ad ur nemra.
Nitni ram-t ad ifreɣ,
Netta ad ɣifsen isteɣ ;
Unna iran ad ides izdeɣ
Ad ilmed tutlayt-nneɣ.
Tamurt-ad tga tinneɣ,
Acengu ad t-nessufeɣ.
Nella da, dagi, ɣi
A nili mek nra !
Llan da, ɣas dɣi,
Irin ad ur nemra.
Afgan irzan ad ireɣ,
G yiman ad t-id-issufeɣ ;
Tamaziɣt tuger akw ureɣ :
Tezwar ta d tann d taddeɣ.
Neqqwcat agensu n wallaɣ
Ur ta tgi ɣurun abbaɣ !
Nella da nsal a nili,
A nili mek nra !
Llan da, ɣas dɣi,
Irin ad ur nemra !


Σumar DERWIC
Imteɣren, sem 01 mayyu 2944 (13 - 05 – 1994

Amawal :

Ablalaɣ : (flamme)
Abbaɣ : (tréfonds)
Myiri : (s’entraimer)
Dɣi : (maintenant)

[Izem33]

TIFAWIN TIGELLININ

Tifawin n tetrit ukrent tillas
Γwebbzent-tent g umda n yiḍ.
Tifawin n yigerḍawen ittergigin
Ddaw tengelt n usekkil n yisiḍ
D yirir irura udida γer yir.
Tifawin n uskukru n tidet
Dat wumum n uzal iswa yilel.
Tifawin n useklu n twengimin
Iqquren g yiferruγen zdinin;
Ttumzint amm txizzut ittufkan
I wul ad iḍer s ameglagal.
Tifawin n wawal n tqerfiyt,
S yigidu, yuwi-nn tikerkas,
Settunt-aγ is da nettemtat.
Tifawin iẓḍan ad ur zrin
Yiẓriten aẓi s nettelkam
Asgif n tguwwa yazun iγef.
Tifawin iffun γef uzwar
Ar aγ-ttirint ammezwar
S yirbi g ur inwi γes amessas.
Nugga-nn γef tewsert tserwat,
Tisinaf n yiqiq as tekkat
Tawada nn-yudsen tilelli.
Tifawin ur d-ifkin γas aḍad
Anammas i tmara innemran,
Nenẓa digsent, iḍ-a, nettelmad
Taguni d ufla n yisey n tixat.
Tifawin n tugniwin isseγrin
Awal g yimi ur ittyannin,
Zzenzant afafa-nneγ d unemri.
Ncerreg ul ad d-ifser tiwan
N ubeẓẓen mi teγrid ay aγuri.

Σumar DERWIC
Igwelmimen g 01 cutanbir 2956

12-09-2006


T U D D S A

Tawada ur issin ka n yigli,
Ur tli awd azgen n yili;
Tawuri inγan amulli,
Aḍar ittnuzuγen tikli.

Manza tirufiwin-lli
Issirimen akal ilelli?
Isigniw d yirugga hilli;
Acenyaf, ṭṭfeγ-t ccil-i.

Azen-d ul nna issuddan,
Ad aγ-ulwun yisiwan!
Ssukin i tidet yigran,
Tessegres tnumi g yiḍan.

Yamum udida g yizergan,
Iγallen, walu-ten kigan;
Ahu-nneγ iγuf inigan,
Asenfar, maγ is ttugan?

Wenna γur ifer neγ azal
Issels aẓennar i tḥellal,
Mer yufi ttin-as yifukal:
Tiflut ur ilin areggal!

Aweḍ-as ameẓẓuγ ay awal
I wenna illan d anemmal!
Nettyafa nella d aziwal,
Da nesγaca s aẓi n yimal.


Σumar DERWIC
Tizi n Yimnayen g 01 febrayer 2955
12-02-2005

Amawal: Tuddsa: Organisation; Nnuzeγ: Ignorer; Tirufiwin: Poches; Acenyaf: Orgueil; Adida: Bruit; Ifukal: Handicapés; Tiflut: Porte; Areggal: Serrure; Anemmal: Guide; Aziwal: Borgne; Sγaca: Scruter; Aẓi: Direction

[Izem33]

AKURMU N TUCKA
GEOLE DE TOUCHKA

Da d-issektay umedyaz, g tmedyazt-a,
askurmu aruγdim nna yas-ittugan g tmegga n
mayyu 1994 g Yimteγren g unẓul ugmiḍ n
Merruk. Sudsen yinesduba imerrukiyen
ammuker-nnes gren-t-inn g yiwen ukurmu
γur imadlasen d yizubyaten ittuten s tefgurin
timeqwranin.
Da d-isskan umur amezwaru g uḍris
asmuγey n wul iga usnirt adankan ittugen i
yitsen yimeγnasen imaziγen imelwan ilin
addur.

Ittwassen udabu amerruki s uḍeffur n
tεerbaẓri, ar issenkar tirit g Yimaziγen, netta
yasen-ittekksen izerfan-nnsen n yifganen. Ar
isenfali umedyaz anemmuttel-nnes d teγtestnnes
γer yidis n yimyisaten-nnes d tutlaytnnes
tanyut, tutlayt n yilelliyen, acku
tehhugger tmentilt γef ittrara.

Dans ce poème, le poète rappelle son
incarcération injuste lors des événements de
Mai 1994 à Imteghren au Sud-Est du Maroc.
Les autorités marocaines ont organisé son
rapt et l’ont jeté en prison au milieu des
criminels et des voyous qui purgeaient de
lourdes peines.
La première partie soulève
l’indignation contre ce traitement dictatorial
à l’encontre d’honorables et pacifiques
militants amazighs. Le pouvoir marocain
connu par l’arabisme déclare la guerre aux
Amazighs en leur niant tous leurs droits
d’êtres humains.
En raison de la noblesse de la cause
défendue, le poète exprime son engagement
et sa détermination auprès des siens et de sa
langue maternelle, langue des Hommes
Libres.

AKURMU N TUCKA
Kraḍ mayyu, inekraf
s akurmu n Tucka,
nettuzuḥ-d izwir n wass
s akurmu n Tucka,
nettukref d imednunas
g ukurmu n Tucka,
neča aγrum amessas
g ukumu n Tucka;
nenẓa ur nesskir lbas,
nga tarwa n tissas.
Nnan-aγ ayt tkerkas:
"Tamaziγt, neqqen-as!"
Neggulla nekwni d tillas
ur nettemsasa;
ummṛent fellaγ tlumas,
ar nettusetsa.
Surten gezmen aγaras,
semden s taḍṣa.
Naru i ayt tkerkas:
"Tamaziγt, neks' as!"

GEÔLE DE TOUCHKA
Troisième jour de mai,
le rapt des jeunes renaît;
ligotés vers la geôle:
adieu docile école!
Rejoins les criminels
de Touchka, citadelle!
Goûtez du pain sans sel
et l’injustice cruelle,
Vous qui êtes dans l’erreur,
vous, disciples d’honneur!
La puissance sans coeur
nous réitère ses leurres.
Chasserons-nous ces ténèbres
et des accusations de maîtres
moqueurs, autoritaires?
La réplique s’assure claire:
cette identité qui les écoeure
battra, encore, et nos coeurs!

[Izem33]

TAYRI N YIMAL

Da neẓẓad asefru Ad nγwem ulawen;
Da nkessa yan uwru.
Abrid γas issawen.
Ini i Yimaziγen nekkin is riγ a nili!
Imurig n ucengu,
Gan tamtunt i tmara,
Kerzen digneγ agu,
Nesnuggur tafrara
Ini i Yimaziγen nekkin is riγ a nili!
Agummu n umalu,
Tegma diges twekka;
Yagur-as i useklu;
Agreḍ, ur t-ittekka.
Ini i Yimaziγen nekkin is riγ a nili!
Nellem diγ agensu,
Nessaki-d aqercal;
Taḍut-inu, ad tefsu
Af a naf mas neddal.
Ini i Yimaziγen nekkin is riγ a nili!
Tiwent, ad teg aγamu,
Ad tessudu s tigi;
Taktert, ad iss namu
G umezruy d inigi.
Ini i Yimaziγen nekkin is riγ a nili!
Ssaffeγ-d ul s teγlu,
Agrures$ ikka iγir,
Naggum a nsew aγu
Ur tezziged a tarir!
Ini I Yimaziγen nekkin is riγ a nili!

Σumar DERWIC Igwelmimen g 12 γuct 2965 24-08-2006

[Izem33]

GRAT-D IFASSEN!

Seg Yimgunen ar Msemrir,
Seg Tazarin ar Tinγir,U Γiγuc, ir' ad yidir;
Adabu, da t-izizdir.
Izerfan, llan-nn g yir
D Merruk da ittirir.
Tiεurrma, tedda s uzir,
Da tneggwa amm ubadir,
Tekkat ad inem ugadir
Ad taf, yan wass, ad tidir.
Grat-d! Grat-d ifassen!
Tamara-ya, tettwasen.
Abrid, ur illi s adrar,
Ur iγri γas iwis n umγar.
Tawuri, tin uzaγarNe
γ iwer-inn i Jibralt'ar.
Nezla nebbi-k ay ad'ar,
Ur nessin yu g tmizar,
Tasa, tettuγul adγar
Ig aγ-imellul wazzar.A
γuyyi-nneγ, da ittγar
Amm tuga inγa wafar.
Grat-d! Grat-d ifassen!
Tamara-ya tettwassen.
Izuz wakal g Biyya,
Ur d-iqqimi γas amya ;
Tiwizi d-tuwi Spanya,
Yuker-aγ-tt jaḍarmeyya.Amasin yannin isγayya,
Awd yan innan : « Matta uya ? »
Rbaḍ, inn’ aγ : « Thenna ! »
Tader ugar n tlettmeyya !
Is ur idd Falaṣṭin aya ?
Ran wi ubuy n tguta.
Grat-d! Grat-d ifassen!
Tamara-ya tettwassen.

Σumar DERWIC

[Izem33]

Tala n Ulili : Tajmilt i Dda Lmulud

Nufa-n Tala n Ulili
Tessemḍay alili ;
Tenγa-kem a tilelli
Tessiger i yimeṭṭawen.

Izri urgaz n lεali,
Ul d tasa n tamelli ;
Γer sdat iga tikli
Ira akk imdanen.

A Dda Lmulud !
A Dda Lmulud !
Aman ira ugdud.
A Dda Lmulud !
A Dda Lmulud !
Iman s nla afud.

Isra am uḥuli,
Aṣemmiḍ ur illi
Acengu n tfeḥli
Ay d as-hilli imedyen.

Ayt Mεemmer isli
Mi ittwaker umulli,
Itri-nnes aha yuli,
Da ismuyud iεdawen.

A Dda Lmulud !
A Dda Lmulud !
Aman ira ugdud.
A Dda Lmulud !
A Dda Lmulud !
Iman s nla afud.

Neswa deg Tala n Ulili
Tayeḍ am yiḍelli ;
Imal diγ a nwali
Timerẓag itteqqlen.

A Dda Lmulud !
A Dda Lmulud !
Aman ira ugdud.
A Dda Lmulud !
A Dda Lmulud !
Iman s nla afud.

Iɣil Σebbuda (Leqser) deg 16 ɣuct 2941 / 04- 08- 1991

Σumar DERWIC

[Izem33]

Tarwa n tirrugza

Key ayaw n Σeṭṭa,
Uletmak tirrugza,
Tesseṛmi-k tmara
G idurar d tmesna.

A memmis n tɣerma
Ur k-iktiy umata !
Teddred g Umaɣa,
Seg win Ziz ar Dra,
Seg Saɣru ar Sirwa.

Imgunen ag d-nufa
Tessalid tigwemma
Ur jjun tedmi takna,
Sebhaḍent inmudda.

Assa, laḥ may nenna,
Irey sɣur Win ufella,
Wasru seg tmenqella :
Kṣuḍeɣ ad intel Σeṭṭa.

Ikka-d waṭṭan tirra,
Awal ad immet asra,
Nessutur a tarwa
Ad tsenmed tisegwra
Ad taɣ tiṭ timura.

Гriɣ-am a tirrugza
N waggug d unmila :
Ader-as, hill i tawda
Tɣensed timmuzɣa !

Zedɣen yiman n Σeṭṭa
Zund aḍeggwig g wasa,
Issiriw-aɣ-d afa,
Idrus mantur igna,
Digneɣ, aha, illa !

Tus’ aɣ-d akw twala,
Tigi tin tsuta
Ittamẓen asala :
Iqqen ad yili Σeṭṭa !

Key a memmis n Σeṭṭa,
Iks’ ak Yuger d Yuba,
Ssikez iman i umata !
taḍwalt tugey tuffra,
Amezruy izmel da !


Σumar DERWIC
Igwelmimen, aram 19 mayyu 2933 (31/05/1983)

[Izem33]

Tiγermatin

Tiγermatin n udrar,
Issencef-tent unz'ar
Manik ay amessal?
Idd ak-yawed' wawal?
Igeddimen nezri-ten,
Mek nerna ran ad d'ren

Γas nehwa g twizi,
Is nr' ad ur nili?
Netteddu amm wulli,
Netteddu deg tili!

Iyma, iyma!
Riγ ad nili.
Uttma, uttma!
Iqqan ad nili.
Iqqan, iqqan-aγ
Iqqan ad nili
Akw nekwni d tlelli.

Poème ecris par H'mmu kemous et Omar derwich

Petits villages


Tant de hameaux de nos montagnes
Ecorchés par les orages
Où te trouves-tu, toi l'artisan?
Recevras-tu mon message?
Les tours, les tours délaissées
Par mégarde
Pourraient s'effondrer

Oublieux de sa mémoire
L'invisible nous séduit?
Nous allons dans les ténèbres.
Sur leurs sentiers, vous bêlez.

Frangin, frangine
Je ne peux mourir
Frangin, frangine
Il vous faut exister
Tous compagnons
Il nous faut exister
Vivre libre, vous et nous

Poème écris par : Omar, Muriel & H’mmu

[Izem33]

TAFUGLA N UWAΓZEN

Mennaw Imaziγen
Ur γursen γas isem;
Tawuri lan tgem
G tgemmi n ussitem.
Sγuy, rgem, gemgem!
Ur rin γas askwertem.
Neẓra nesnaγes-ten,
I yiman ran aggwerḍem.
Kcan i ucengu afus,
Ad izizzel idammen;
Gan taḍa d umillus,
Ackuḍer i kra inmen,
Lemden kigan asγus
N tekti d-inneflen.
Ssirdataγ, hill' ammus!
Izga d awal-nnsen.
Tiseqqima n tegrawla
Da ttebbint Infusen,
Ageḍrur n tazzla
Isluḍ-aγ iẓriten.
Teγrid a tagwella
Ar tekkated ifassen!
Aγudwu n tmeḍla
Ittusγel i yimawen.
Aseggiwer n wuffal
Irgig, altu, duyen;
Tiwent iṣkan awal
Tesdaddey imruten.
Allaγ illeγ arsal,
Fsan ikennaden.
Aẓennar ad yuklal:
Asgwen i yifisen.

Tamedyazt n Σumar DERWIC
Igwelmimen, acur 12 maγres 2946
24- 03- 1996

[Izem33]

ASEΓTI N UZEGGAL

Qqilat-aγ kwenni ur nessin !
Tellam ttuẓmim-nn dinn :
Nγal amaḍal is ur imeyyin
S amm nekk d kemm d keyyin;
Amyalkam graγ ur, diγ, llin.
Da kkateγ ad ferḍeγ tiseggwin,
S ireftilen nwant-i tfednin,
Iḍudan yaḍen ur annin
Ar ackuḍer-inu, geγ igellin:
Smuttyat s nnigi tiṭṭawin!
Iman-inu uḍren g turarin,
Temẓi zriγ han tiyeḍnin,
Mmekrasent felli tagutin,
Ifsan n ufafa-nu ttuglin
S yilxixen d-uwint tigiwin.
Assa, nẓiγ is ur i-uwin
Inegyan isaggugen tilawin,
Ittebbin abrid n tezrawin,
Ukzeγ aγudwu yi-yettin
Beddeγ ar sγacaγ timeḍlin;
Rḍaḍsen wulawen i-yugin,
Uḍneγ is mdin timḍufin
Ussan mgal n tlelliyin.
Sellat i yiẓuga d-ttalinin
Seg tewsitin timaynutin!
Giγ f useγti n tuttriwin,
Aqel-i da ferrneγ tiktiwin
Ard isineγ ayenna ur nessin.
Ad ntiγ s uya yi-d-yujin
Awseγ, nemyaf d id zund nekkin.

Tamedyazt n Σumar DERWIC
Igwelmimen, ahad 26 yanayer 2946
07-02-1996